🅱🅻🅰🅽🅲🅷🅴 🅼🅾🅽🅽🅸🅴🆁 ඛේදවාචකය ....

                                         🅱🅻🅰🅽🅲🅷🅴 🅼🅾🅽🅽🅸🅴🆁 ඛේදවාචකය .... 

ඔයාව කවුරු හරි පැහැර ගත්තොත්? ඒක හිතන්නව්ත් අකමැති විදියේ මාතෘකාවක් තමයි.. එහෙනම් පොඩ්ඩක් හිතලා බලන්න, ඔයාව පැහැර ගත්ත ගෙනා, ඔයාගෙම c නම්?? ඒ ගැන හිතන්නවත් පුළුවන් ද??

මේ එහෙම කතාවක්...

Blanche Monnierගේ ජීවිතයට සම්බන්ධ සේයාරූ කිහිපයක් මම මේ ලිපියත් එක්කම අමුණලා තියෙනවා.

                                             

Blanche Monnier

මේක ටිකක් පරණ කතාවක්... මේක පටන් ගන්නේ 1876 අවුරුද්දෙ ප්‍රංශයේ එක ගමකින්..

අපි හැමෝම දන්නවා, අහලා තියෙනවා නේ, ප්‍රංශ යුවතියන් උපතින් ම හරිම හැඩ සුන්දර ආදරණීය චරිත බව.. මේ කතාවත් ඒ වගේ ම සුන්දර යුවතියක් ගැන.. ඇය Blanche Monnier...

1876 වෙනකොට ඇයට වයස අවුරුදු 25ක්.. ඉතිං ඒ ජීවිතේ හොඳම වයසෙදි අනික් තරුණියන් මෙන් ම ඇයත් ආදරයෙන් බැඳෙනවා..

තරුණයෙක් ම නොවෙන තරමක් මැදි වයසේ නීතීඥවරයෙක් තමයි Blanche Monnierගේ ආදරය දිනා ගන්නේ..

සරලව සුමුදුවට ගලාගෙන ගිය මේ ආදර කතාවටත් දුෂ්ඨයෙක් හිටියා.. ඒ වෙන කවුරුත් නෙමෙයි, Blanche Monnierගේ අම්මා, ඒ කියන්නේ මැඩම් Blanche..

මැඩම් Blanche කොහොමටවත් කැමති වුණේ නෑ Blanche Monnierගේ පෙම්වතාට... ඇය මේ සම්බන්ධයට දැඩි ලෙස විරුද්ද වුණා.. ඒත් ඉතිං ප්‍රේමයෙන් මත් වෙලා හිටපු Blanche Monnier නම් තමන්ගේ අම්මා කියන කිසි දෙයක් කනකට ගත්තේ නෑ..

මැඩම් Blanche, තමන්ගෙම දුවට වැඳ වැටුනේ නැති ටික විතරයි, මේ සම්බන්ධය නවත්වන්න කියලා.. ස්වභාවයෙන්ම මුරණ්ඩු ගති තිබුන Blanche Monnier තමන්ගේ පෙම්වතාව අතාරින්නේ නැති බව මැඩම් Blanche තේරුම් ගත්තා..

ඒ නිසාම මැඩම් Blanche තමන්ගෙම දුව වුණ Blanche Monnier ව තමන්ගෙම නිවසේ සොල්දර කාමරයේ ( Attic room ) හිර කලා...  මේ කාමරයේ ජනේල පවා සීල් කරලා ඉර එලියක්වත් වැටෙන්නෙ නැති විදියට සකස් කලා..

නිදහස් වෙන්න අවශ්‍යය නම් තමන්ගේ ප්‍රේමවන්තයා ව අතහරින්න කියලා Blanche Monnierට බල කලා.. හපොයි ඒත් Blanche Monnier ගේ මුරණ්ඩුකම කොච්චරද කියනවා නම් ඇය තීරණය කලා, මුළු ජීවිත කාලයම කාමරේ ඇතුලට වෙලා හිටියත් සම්බන්ධය නවත්වන්නෙ නම් නෑ කියලා..

මුළු ජීවිතකාලයම ඔහුව නොදැක හිටියත් ඔහුව අතහරින්නෙ නැති බව ඇය එක හෙලාම ප්‍රකාශ කලා...



ඉතිං ඇයට ඒ කුඩා කුටියේ හිර වෙලාම ඉන්න සිද්ද වුණා.. මොකද ඇයගේ මවත් ඇය තරම්ම මුරණ්ඩු කාන්තාවක් නිසා..

රෑර විතරක් අම්මා කාමරේ ඇතුලට දාන මොනවා හරි කෑම ටිකක් කාලා, අඳුරු කාමරයේ කෙලවරක තිබුන ඇදට වැටිලා දවස් ගත කරන එකට ඇය පුරුදු වුණා..

Blanche Monnier හිතුවා වගේම ඇයට ඇයගේ පෙම්වතාව ආයේ කිසිම දවසක දකින්න ලැබුනේ නෑ.. මොකද 1885 අවුරුද්දේ එක දවසක ඇයගේ හිත ගත් ප්‍රේමවන්තයා අවසන් ගමන් ගිය නිසා.. ඔව්, ඒ වෙනකොට ඇය සොල්දර කාමරයේ හිර වෙලා අවුරුදු නමයක්ම ගත කරලා..

ඔය අතරේ, Blanche Monnier ගේ හදිසි අතුරුදහන් වීම ගැන මිනිස්සු ප්‍රශ්න කරන්න ගත්තා.. මැඩම් Blanche සමාජයේ හොඳ තැනක් තිබුන කාන්තාවක්.. ඉතිං ඇයට තමගේ තැන නැති කර ගන්න අවශ්‍යය වුණේ නෑ..

ඒ නිසා ම ඇය, තමන්ගේ පුතා එහෙමත් නැත්නම් Blanche Monnierගේ සහෝදරයා එක්ක එකතු වෙලා ව්‍යාජ ලෙස Blanche Monnier මිය ගිය බවට ප්‍රචාරය කලා..

ඔවුන් කොයි තරම් තාත්විකව එක කලාද කිව්වොත් සාමාන්‍ය මිනිස්සුන්ට ඒක ගැන කිසිම සැකයක් වුණේ නෑ.. ඉතිං තමන්ගෙම නිවස ඇතුලේ හිරකාරියක් වෙලා ජීවිතය ගෙවන Blanche Monnier භාහිර සමාජයට නම් මැරුණ ගැහැණියක්..

Blanche Monnierගේ අම්මා වගේම ඇයගේ සහෝදරයා ලැබෙන හැම අවස්තාවකින් ම ප්‍රයෝජන අරන් සමාජය ඉස්සරා අඬමින් වැලපෙමින් ඇයගේ මරණයේ පුවත ප්‍රචාරය කරන්න වුණා..

කාලය හෙමි හෙමින් ගෙවිලා යන්න වුණා.. මැඩම් Blanche තමන්ගෙ පුතාවත් විවාහ නොවී ඉන්න පොළඹව ගත්තා.. ඒකේ ප්‍රතිපලයක් විදියට ඔහු වයස අවුරුදු පනහක් වෙනකල් ම තනිකඩ ජීවිතයක් ගත කලේ අම්මාගෙම නිවසට වෙලා..

 ඒ වගේම ඒ ගත වුණ කාලයේ එක මොහොතකටවත් ඔහු තමන්ගේ සොහොයුරියට අත් වෙලා තියෙන ඉරණම ගැන ප්‍රශ්න කලේවත් ඇය වෙනුවෙන් කතා කලේවත් නැති තරම්..

කාලය අවුරුදු විසිපහක් ම ගත වෙලා ගියා.. 1901 අවුරුද්දෙ එක දවසක ප්‍රංශ පොලීසියට ලැබෙනවා නිර්ණාමක ලිපියක්.. මේකෙන් කියවුණේ Blanche නිවසේ අමුතු සිදුවීම් සිදුවෙන බවක්.. සොල්දර කාමරයේ වැසුන ජනේල අතරින් ඇහෙන විලාපයක් ගැනත් මේ ලිපියේ සඳහන් වුණා..

අන්තිමට මේ ගැන පරික්ෂා කරන්න ප්‍රංශ පොලිස් නිළධාරීන් කිහිප දෙනෙක් Blanche නිවසට යනවා... ඒත් මැඩම් Blanche නම් ඔවුන් ව නිවසට ගන්න කැමත්තක් පෙන්නුවෙ නෑ.. ඇය අඩුම තරමේ නිවසේ ඉදිරි දොර විවෘත කරන්නෙත් නැතුව ඔවුන් එක්ක කතා කලේ ජනේලෙකින් ඔළුව එලියට දාලා..

ඇයගේ හැසිරීම සැක සහිත නිසා ම ඔවුන් ඉදිරි දොර කඩාගෙනම නිවසට ඇතුල් වුණා.. නිවසට ඇතුල් වුණ ගමන් ම ඔවුන්ගේ නෑස් පුඩු හරහා දැනුනේ දරා ගන්න බැරි තරමෙ දුගදක්.. ඒ දුගද හමන්නෙ සොල්දරය දිහාවෙන් බව තේරුම් ගත්ත ඔවුන් සොල්දරයට නැගලා එහි තිබුන කුටියේ දොර කඩලා ඇතුල් වුණා..

ඔවුන්ට දකින්න ලැබුනේ ඔවුන් කිසිම විදියකින් දකින්න බලාපොරොත්තු වුණ විදියේ දර්ශණයක් නම් නෙමෙයි..

Blanche Monnier සයනයක් මත වැතිර හිටියා.. ඇයගේ ඇඟේ එක මස් කඳුලක් තිබුනේ නෑ.. තනිකරම හමින් වැහුන ඇට සැකිල්ලක් විතරක් ඉතුරු වෙලා තිබුනා.. තමන්ගෙම මල මුත්‍රා වලින් නෑවිලා දුඟද හමමින් හිටපු ඇයව මනුශ්‍යයෙක් ද කියලා අඳුන ගන්නත් බැරි තරම්ම විකෘති වෙලා තිබුනා..

ඇය වසර විසිපහක් තිස්සේ ම හිරු එලියක්වත් නොවැටුන අපායක් බඳු වූ ඒ කුටියේ හිර වෙලා හිටිය බව ඔවුන්ට අදහාගන්නවත් බැරි වුණා..
                                                        

ඇය වසර විසිපහක් තිස්සේ කුටියේ හිර වෙලා හිටි Blanche Monnie

පොලිස් නිළධාරීන් ඉක්මනින්ම ඇයව රෝහල් ගත කලා.. රෝහලේ හෙදියන් ඇයව නහවලා පිරිසිදු කරලා ඇයට සුදුසු පරිදි කෑම බීම ලබා දුන්නා.. බෙහෙත් හේත් දුන්නා..

මේ සියළු සාත්තු සප්පායම් අවසානයේ Blanche Monnier ඒ හෙදියන්ට ස්තුති කලා ඒ වෙනුවෙන්..

ඉතිං ඒ හැමදේටම පස්සේ Blanche Monnier සාධාරණයක් ඉෂ්ඨ වුණාද?? ඇයගේ ජීවිතයෙන් වසර විසිපහක් ම නිර්ධය ලෙස සොරා ගත්තට පස්සේත්.. එදා වයස අවුරුදු විසිපහක සුන්දර යුවතියක් විදියට සොල්දර කාමරයට පය තියපු ඇය යලි හිරු එලිය දැක්කේ අවුරුදු පනහක් වයසැති මැහැල්ලක් විදියට..

ඒ හැඟීම, ඒ අහිමි වීම.. ඔබට හිතන්නවත් පුළුවන්ද??

එතනින් එහාටවත් ඇයගේ ජීවිතයට සාධාරණයක්?

අපොයි නෑ.. මැඩම් Blanche කොයිතරම් නීච කාන්තාවක් ද කියනවා නම් උසාවියෙදිත් ඇය අපූරු කතාවක් ගොතනවා..

ඇය කියනවා Blanche Monnier මානසික රෝගියෙක් බවත්, ඇයගේ පිස්සුව නිසා ම ඇය ස්ව කැමැත්තෙන් ම ඒ කාමරයට වෙලා කාලය ගත කල බවත්.. Blanche Monnier අවාසනාව කොයිතරම් ද කියනවා නම් ඇයගේ සහෝදරයත් ඒ කතාව සනාථ කරන්නේ, ඇයට කාමරෙන් එලියට යන්න පුළුවන් කම තියෙද්දිත් ඇය ගියේ නැති බව කියමින්..

Blanche Monnierට කොයිතරම් වේදනාවක් දැනෙන්න ඇතිද?

කොහොම නමුත් වැරදි කිහිපයක් නිසා ම මැඩම් Blanche ටත් ඇයගේ පුතාටත් සිර දඬුවම් නියම වෙනවා.. සිරගත වෙලා දවස් පහලොවකට පස්සේ මැඩම් Blonche මිය යනවා..
                                                        

Blanche Monnierගේ අම්මා මැඩම් Blonche

අවසාන මොහොතේවත් ඇය කල පාපයන් ගැන පසුතැවුනාද කියලා නම් දන්නේ ඇයම විතරයි..

Blanche Monnierගේ සහෝදරයා නීතීඥයෙක්.. ඒ නිසාම සිරගත වී සිටියදී ම ඉදිරිපත් කරපු අභියාචනා කිහිපයක් අවසානයේ ඔහු හිරෙන් නිදහස් වෙනවා..

Blanche Monnier?? ඇය කුමක් කරන්නද? ඇගේ ජීවිතයෙන් අහිමි වුණ වසර විසිපහට හානිපූරණයක් කරන්නෙ කොහොමද ?

සිය ජීවිතයෙන් අඩකටත් වඩා ගෙවී ගියාට පස්සේ ජීවිතයේ අවසාන භාගය ගත කරන්න හිසට සෙවනක්වත් නැතිව ඇය අසරණ වුණා.. අන්තිමට ඇයව ප්‍රංශයේ තිබුන එක්තරා මානසික රෝහලක් වෙත යොමු කෙරුනා..

එතනින් එහාට මිය යන තෙක් ම ඇයගේ ජීබිතය ගෙවුනේ එහි.. මානසික රෝහලක් බව නම් ඇත්ත.. ඒ නමුත් අර අවුරුදු විසිපහක් ම සොල්දර කාමරයේ හිර වෙලා ගෙව්වට වඩා සැප පහසු ජීවිතයක් නම් ඇය තමන්ගේ අන්තිම කාලයේ ඒ මානසික රෝහල තුළ ගෙවන්න ඇති..

ඉතිං මේක තමයි සුප්‍රසිද්ධ Blanche Monnier ගේ ඛේදවාචකය... මතක තියා ගන්න.. මෙහෙමත් කතා මේ ලෝකේ තියෙනවා..
. ❤️

අන්තර්ජාලයෙන් ලබා ගත් තොරතුරු ඇසුරෙන්...